චිත්ත වග්ගො 1

ඵන්දනං චපලං චිත්තං
දුරක්ඛං දුන්නිවාරයං
උජුං කරොති මෙධාවී
උසුකාරො'ව තෙජනං

චංචල වූ,චපල වූ,රැකීමට අපහසු,දුසිරිතෙන් වෙන් කොට ගැනීම අසීරුවන සිත නුවණැත්තා,වඩුවකු හී දණ්ඩක් ඍජු කරන්නාක් මෙන් ඍජු කරයි..

අප්පමාද වග්ගො 12

අප්පමාද රතො භික්ඛූ
පමාදෙ භයදස්සී වා
අභබ්බො පරිහාණාය
නිබ්බාණස්සෙ ව සන්තිකෙ

නොපමාවෙහි ඇලුණු,පමාවෙහි බිය දන්නා වූ භික්ෂුව පිරිහීමට බැරි කෙනෙකි.නිවන ඔහු සමීපයෙහි වෙයි..

- - - - - - - - - අප්පමාද වග්ගය නිමි- - - - - - - - -

අප්පමාද වග්ගො 11

අප්පමාද රතො භික්ඛූ
පමාදෙ භයදස්සී වා
සංයොජනං අණුං ථුලං
ඩහං අග්ගී' ව ගච්ඡති

නොපමා බවෙහි ඇලුණු,පමාවෙහි බිය දන්නා වූ භික්ෂුව,ගින්න ලොකු කුඩා දර සියල්ල දවාලන්නාක් මෙන් ලොකු කුඩා සසර බැමි විනාශ කොට නිවන් පුර වදී..

අප්පමාද වග්ගො 10

අප්පමාදෙන මඝවා
දෙවානං සෙට්ඨතං ගතො
අප්පමාදං පසංසන්ති
පමාදො ගරහිතො සදා

නොපමා බව නිසා ශක්‍රයා දෙවියන් අතර ශ්‍රේෂ්ඨ වූයේය.පණ්ඩිතයෝ නොපමා බව පසසති.පමාව හැමදා ගරහති..

අප්පමාද වග්ගො 9

අප්පමතො පමත්තෙසු
සුත්තෙසු බහුජාගරො
අබලස්සං'ව සීඝස්සො
හිත්වා යාති සුමෙධසො

පමා වූවන් අතුරෙහි නොපමාවූත්,නිදන්නවුන් අතුරෙහි බොහෝ නිදි මරන්නාවූත්,යහපත් නුවණැත්තා,වේගයෙන් දුවන අශ්වයා අබලන් අශ්වයා පසුකොට යන්නාක් මෙන්,පමා වූවන් හැර යයි..

අප්පමාද වග්ගො 8

පමාදං අප්පමාදෙන
යදා නුදති පණ්ඩිතො
පඤ්ඤා පාසාදමාරුය්හ
අසොකො සොකිනිං පජං
පබ්බතට්ඨො'ව භුම්මට්ඨෙ
ධීරො බාලේ අවෙක්ඛ්ති

යම් කලෙක පණ්ඩිතයා නොපමාවෙන් පමාව මග හරවා ගනීද,එවිට ඔහු නුවණ නමැති පහයට නැගී ශෝක රහිතව ශෝකී ජනයා දෙස බලයි.ඔහු ඔවුන් දෙස බලන්නේ කදු මුදුනක සිටින නුවණැත්තකු බිම සිටින අඥානයින් දෙස බලන්නාක් මෙනි..

අප්පමාද වග්ගො 7

මා පමාදමනුයුඤ්ජෙථ
මා කාමරතිසන්ථවං
අප්පමත්තො හි ඣායන්තො
පප්පොති විපුලං සුඛං

පමාවෙන් කල් නොයවවු.කාමයෙහි ඇලී ගැලී නොවසවු.නොපමාව ම ධ්‍යාන භාවනා කරන්නා මහත් සැපතට පැමිණේ..

අප්පමාද වග්ගො 6

පමාදමනුයුඤ්ජන්ති
බාලා දුම්මෙධිනො ජනා
අප්පමාදං ව මෙධාවී
ධනං සෙට්ඨං'ව රක්ඛති

දෙලෝ වැඩ නොදත් අනුවණ ජනයා පමාවෙන් හෙවත් නොසැලකිල්ලෙන් කල් යවත්.ප්‍රඥාවන්තයා නොපමා බව උසස් ධනයක් මෙන් රකී..

අප්පමාද වග්ගො 5

උට්ඨානෙනප්පමාදෙන
සංයමෙන දමෙන ච
දීපං කයිරාථ මෙධාවි
යං ඔඝො නා භිකීරති

නැගී සිටි වීර්යයෙන්,අප්‍රමාදයෙන්,මනා සංයමයෙන් හා
ඉන්ද්‍රීය දමනයෙන් ද,යුක්ත වූ පණ්ඩිතයා කෙලෙස් වතුරින් යට නොවන දිවයිනක් හෙවත් උස් තැනක් තනා ගන්නේය..

අප්පමාද වග්ගො 4

උට්ඨානවතො සතිමතො
සුචිකම්මස්ස නිසම්මකාරිනො
සඤ්ඤතස්ස ච ධම්මජීවිනො
අප්පමත්තස්ස යසො භිවඩ්ඪති

නැගී සිටි වීර්යයෙන්ද,මනා සිහියෙන් යුතු,නිදොස් දේ කරන, විමසා බලා කටයුතු කරන,තැන්පත් දැහැමි දිවි පැවතුම් ඇති නොපමා වූ පුද්ගලයාගේ කීර්තිය මනාව වැඩේ..

අප්පමාද වග්ගො 3

තෙ ඣායිනො සාතතිකා
නිච්චං දළ්හ පරක්කමා
ඵූසන්ති ධීරා නිබ්බාණං
යොගක්ඛෙමං අනුත්තරං

ධ්‍යාන භාවනා කරන,නිරතුරුව පවත්නා වීර්ය හා දැඩි උත්සාහය ඇති ඒ පණ්ඩිතයෝ,කාමාදී යෝගයන්ගෙන් නිර්භය වූ දුකින් වෙන්වූ නිවන ලබති..

අප්පමාද වග්ගො 2

එතං විසෙසතො ඤත්වා
අප්පමාදම්හි පණ්ඩිතා
අප්පමාදෙ පමොදන්ති
අරියානං ගොචරෙ රතා

මේ කරුණු වෙසෙසින් දැන ආර්ය‍යන්ටම විෂය වන නොපමා බවෙහි ඇලුණ පණ්ඩිතයෝ තමන් නොපමා බවෙහි බෙහෙවින් සතුටු වෙති..